| 336 |
साउन २१ धनगढी । सुदूरपश्चिम प्रदेशका नवनियुक्त मुख्यमन्त्री कमलबहादुर शाहले आज पद तथा गोपनीयताको शपथ लिँदैछन् ।
दोस्रोपटक आइतबार मुख्यमन्त्रीमा नियुक्त भएका शाहले आज दिउँसो साढे ३ बजे सपथ ग्रहण गर्ने भएका हुन् । प्रदेश प्रमुखको कार्यालयले सपथ ग्रहण कार्यक्रमका लागि आवश्यक तयारी भइरहेको जनाएको छ। मुख्यमन्त्रीमा नियुक्त भएका शाहले शपथ ग्रहणलगत्तै मन्त्रीपरिषद् विस्तारको तयारी समेत गरेका छन्।
मुख्यमन्त्री शाहले सत्तारूढ नेकपा एमालेसँग छलफल गरिरहेका छन्। कांग्रेसबाट बहादुरसिंह धामी र मेघराज खड्का मन्त्री बन्ने गरी नाम टुंग्याइएको र छलफल जारी रहेको कांग्रेसले जनाएको छ । नेपाली कांग्रेस र नेकपा एमालेबीच तीन÷तीन मन्त्रालय लिने समझदारी भए पनि कुन मन्त्रालय लिने भन्ने विषयमा टुंगो लाग्न बाँकी छ। नागरिक उन्मुक्ति पार्टीलाई समेत एउटा मन्त्रालय दिएर सरकारमा सहभागी गराउने मुख्यमन्त्री शाहले तयारी गरेका छन् ।
