बझाङ, पुस १८। बझाङमा जिप दुर्घटना हुदा एकै परिवारका तिनसहित चार जनाको मृत्यु भएको छ। बिहिबार राती साढे ९ बजे तलकोटबाट चैनपुर जाँदै गरेको से १ ज ८४३ नम्बरको जीप तलकोट गाउँपालिका-१ स्थित धमेना नजिकै दुर्घटना हुँदा एकै परिवारका आमा छोरा र नातिनीसहित चार जनाको मृत्यु भएको हो।

मृत्यु हुनेमा तलकोट गाउँपालिका-४ का ३६ वर्षीय बम बहादुर धामी,उनकी ७२ वर्षीया आमा जौमती देवी धामी र केदारस्यु गाउँपालिका १ का ३३ वर्षीय जीप चालक सम्शेर मल्ल रहेका जिल्ला प्रहरी कार्यालय बझाङका प्रमुख डिएसपी युवराज भण्डारीले जनाएका छन्।

उनका अनुसार दुर्घटनामा गम्भीर घाइते भएकी मृतक बम बहादुर धामीकी ६ वर्षीया छोरी आकृति कुमारी धामीको अस्पताल लैजादै गर्दा मृत्यु भएको हो। जीप करिब २०० मिटर तल खसेको डिएसपी भण्डारीले बताए। दुर्घटनाबारे थप अनुसन्धान भइरहेको जिल्ला प्रहरी कार्यालय बझाङले जनाएको छ।