बझाङ,पुस १९। बझाङमा भएका २ वटा छुट्टाछुट्टै जिप दुर्घटनामा परेर एकै परिवारका तीनसहित पाँच जनाको मृत्यु भएको छ।

बिहीबार राती बझाङको मष्टा गाउँपालिका र तल्कोट गाउँपालिकामा भएका छुट्टाछुट्टै जिप दुर्घटना हुँदा ५ जनाको मृत्यु भएको प्रहरीले जनाएको छ। बझाङको मष्टा गाउँपालिका १ कोटदेवलमा जिप दुर्घटनामा परेर चालकको मृत्यु भएको छ। दुर्घटनामा ज्यान गुमाउनेमा मष्टा गाउँपालिका-१ रनाडाका ४२ वर्षीय धर्म थापा रहेका छन्।

जिल्ला प्रहरी कार्यालय बझाङका अनुसार, भातेखोलाबाट रनाडातर्फ जाँदै गरेको सुदूरपश्चिम प्रदेश ००१ ज १३९८ नम्बरको जिप कोटदेवलमा सडकबाट करिब १०० मिटर तल खसेको थियो। जिपमा चालक थापा मात्र सवार रहेको र घटनास्थलमै उनको मृत्यु भएको वडा अध्यक्ष रामचन्द्र रोकायाले जानकारी दिए।दुर्घटनाको कारणबारे थप अनुसन्धान भइरहेको प्रहरीले जनाएको छ।

यस्तै, बझाङकै तलकोट गाउँपालिकास्थित धमेनामा जिप दुर्घटना परेर एकै घरका ३ जनासहित ४ जनाको भएको छ। बिहिबार राती साढे ९ बजे तलकोटबाट चैनपुर जाँदै गरेको से १ ज ८४३ नम्बरको जीप तलकोट गाउँपालिका-१ स्थित धमेना नजिकै दुर्घटना हुँदा एकै परिवारका आमा छोरा र नातिनीसहित चार जनाको मृत्यु भएको हो।

मृत्यु हुनेमा तलकोट गाउँपालिका-४ का ३६ वर्षीय बम बहादुर धामी,उनकी ७२ वर्षीया आमा जौमती देवी धामी र केदारस्यु गाउँपालिका १ का ३३ वर्षीय जीप चालक सम्शेर मल्ल रहेका जिल्ला प्रहरी कार्यालय बझाङका प्रमुख डिएसपी युवराज भण्डारीले जनाएका छन्। उनका अनुसार दुर्घटनामा गम्भीर घाइते भएकी मृतक बम बहादुर धामीकी ६ वर्षीया छोरी आकृति कुमारी धामीको अस्पताल लैजादै गर्दा मृत्यु भएको हो। जीप करिब २०० मिटर तल खसेको डिएसपी भण्डारीले बताए। दुर्घटनाबारे थप अनुसन्धान भइरहेको जिल्ला प्रहरी कार्यालय बझाङले जनाएको छ।