कैलाली,पुष २६। कैलालीको धनगढीबाट बझाङतर्फ जाँदै गरेको जिप डडेल्धुरामा दुर्घटनामा परेको छ । 

जिल्लाको अमरगढी नगरपालिका–६ भालुमारेस्थित भीमदत्त राजमार्गमा शुक्रबार बिहान धनगढीबाट बझाङतर्फ जाँदै गरेको सुपप्र ०१००१ ज १६७२ नम्बरको जिप दुर्घटना भएको हो।

डिजेल र पेट्रोल बोकेको जिप ७० मिटर तल खसेको बताएको प्रहरीले जनाएको छ। जिप चालक बझाङको सुर्मा गाउँपालिका–२ का २१ वर्षीय रवीन्द्र बोहरासहित जिपमा सवार अन्य ३ जना सकुशल रहेका जिल्ला प्रहरी कार्यालय डडेल्धुराले बताएको छ। जिपमा २ ड्रम डिजेल र २ ड्रम पेट्रोल लोड गरिएकोमा डिजेल पूरै पोखिएको र दुर्घटनाको कारण खुल्न नसकेको डडेल्धुराका प्रहरी निरीक्षक उपेन्द्र बमले जानकारी दिए।