डोटी, पुस २०। डोटीको सायल गाउँपालिका ६ मा एक महिलाको शंकास्पद मृत्यु भएको छ ।

सोही गाउँपालिका वडा नम्बर ६ दल्लेखकी २३ वर्षिया शान्ति नेपालीको आज (शनिवार)शङ्कास्पद मृत्यु भएको जिल्ला प्रहरी कार्यालय डोटीका प्रहरी नायव उपरीक्षक डिएसपी भिमलाल भट्टराईले बताए।

महिलाको शंकास्पद मृत्यु भएपछि प्रहरीले उनका श्रीमान भीम नेपालीलाई पक्राउ गरेको छ। डिएसपी भट्टराईले महिलाको मृत्युको कारण नखुलाई सतगतको तयारी गरिएपछि माइती पक्षले घटनाबारे प्रहरीलाई जानकारी गराएको बताए। डिएसपी भट्टराईका अनुसार मृतकका श्रीमानले बिहान करिब ४ बजे शान्तिको मृत्यु भएको शङ्कास्पद खबर माइती पक्षलाई दिएको बुझिएको छ।

मृतकका काका नाता पर्ने केआईसिंह गाउँपालिका-४ बस्ने लाले नेपालीले प्रहरी चौकी वायलमा जानकारी गराएपछि मृतकका श्रीमानलाई नियन्त्रणमा लिइएको हो। शंकास्पद मृत्युको आशंका पछि शवलाई पोस्टमार्टमको लागि जिल्ला अस्पतालमा पठाइएको प्रहरीले जनाएको छ ।  घटनाको अनुसन्धान भइरहेको छ।