पोखरा,पौष २५। पोखरा महानगरपालिका १६ दिपहाउजिङ नजिकै रहेको सेती नदीको ड्यामबाट खसेर २१ वर्षीय युवकको ज्यान गएको छ ।

मृत्यु हुनेमा कैलाली, धनगढी स्थायी घर भई पश्चिममाञ्चल ईन्जिनियरिङ क्याम्पस (डब्लूआरसी) लामाचौरमा अध्ययनरत २१ वर्षीय संगम पौडेल हुन् । उनी क्याम्पस नजिकै पोखरा-१९ लामाचौरमा डेरा गरी बस्दै आएको बताइन्छ।

बुधबार साँझ ७ बजेर २० मिनेटमा सेतीको ड्याममा मान्छे खसेको सूचना आएपछि सशस्त्र प्रहरी बल, कालीका गण कास्कीबाट उद्धार टोली खटिएको गणका सूचना अधिकारी डीएसपी राजनलाल श्रेष्ठले बताएका छन्। चार जना गोताखोरसहित ९ जनाको विशेष विपद् व्यवस्थापन टोलीले उनको शव निकाली पोस्टमार्टमका लागि मनिपाल शिक्षण अस्पताल लगिएको छ । सशस्त्रले २० मिनेटमै नदीबाट शव निकालेर अस्पताल पुर्‍याएको थियो ।